Miss Aruba Gillain Berry anuncia su proyecto para Miss Mundo “Beauty with a Purpose”

Recientemente durante un conferencia di prensa nos Miss Aruba a anuncia su projecto “Beauty with a Purpose” cu e lo presenta durante Miss World 2011 cu lo tuma lugar na London dia 6 di November proximo. Gillain a scohe e Fundacion Special Olympics Aruba cu ta organisando nan National Games den luna di November.

E lo mester traha un video di 3 min pa asina presenta y promove e National Games di Special Olympics durante e certamen final di Miss World 2011. E video lo consisti di un entrevista cu Sr. Karel Williams, National Director Special Olympics Aruba, entrevista cu algun atleta di e National Games 2011 y por ultimo un parti di su conferencia di prensa unda e ta anuncia su projecto pa “Beauty with a Purpose” na comunidad di Aruba. Durante di e conferencia di prensa Sr. Karel Williams di Special Olympics a anuncia nan National Games pa 2011 y a elabora tocante e National Games cu lo tuma lugar durante e weekend di dia 11 di November na Piedra Plat Entertainment Center. Nos Miss Aruba 2011 conhuntamente cu Special Olympics ta invita pueblo henter pa asisti na e National Games 2011. Mas informacion tocante di e National Games di Special Olympics Aruba lo ser anuncia den medionan di comunicacion entrante di dia 7 di November. Gillain ta gradici Sergio Winterdaal cual a graba y edit e video pa e projecto di “Beauty with a Purpose” y tambe su patronisador Aruba Bank cu ta support Gillain den tur su projectonan.